煲呔呢幾日好風騷，梗係啦，連港大鍾庭耀嘅民調都話佢有六十六分幾，比起老董高好多，點會唔心花怒放。民望一高，自然輕鬆自信，所以煲呔唔怕上電台同去立會，同大家真情對話。
曾太撐夫着綠衫
係人都知煲呔為求達到目的，會用盡各種方法，所以八方以為佢想討好白鴿黨，用綠色做施政報告主色，原來今次估錯咗。識得佢嘅人話，煲呔不嬲都鍾意綠色，以前架車係深綠色，曾太又時時着綠色衫（女為悅己者容呀），重有今年六月煲呔競選時用嘅logo用咗藍綠色，都係因為佢指定用青綠色做主色。到咗前日宣讀施政報告，煲呔重引咗句王安石嘅「一水護田將綠繞，兩山排闥送青來」作結，一樣有「綠」字同「青」字，睇嚟佢已經到咗無綠不歡、綠綠無窮嘅地步。
既然上有好者，施政報告當日，除咗特首夫人着綠色碎花外套，煲呔兩位左右手黃灝玄以及陳羿都特登打晒綠呔，以示支持。八方重發現肥龍同馬丁當日都好似打咗條綠呔，着淺綠色恤衫；馬丁可能係巧合，肥龍肯定係明撐老頂。嗱，各位想上位嘅AO，雖然中國人皮膚黃，着青綠色衫好易面有菜色，但老細鍾意，識做啦。
噚日煲呔上立法會，叫人少啲尖酸刻薄，咁係咪叫大家擦鞋呢？睇嚟又似，即如佢份施政報告，各大黨派都話收貨，連成日鬧煲呔嘅鄺志堅，都讚番煲呔一句，話佢政治方面嘅搞作真係幾掂，至少都可以符合「政治家」嘅所為。不過鄺大狀噚日就同八方投訴，話佢呢番讚煲呔嘅說話，好少人報道喎，唔通個個都鍾意佢鬧煲呔多啲？
放工輕鬆睇黎明
煲呔重有高招，就係加大力度拉攏關係。除咗話會加強同人大政協聯繫，亦都首次提及鄉議局，令到鄉議局主席劉皇發鬼咁開心，會後重同鄺志堅講，話由殖民地至老董時代，鄉議局都被忽視，估唔到煲呔會特別提及佢哋，真係喜出望外。
忙完施政報告又上完答問會後，夜晚煲呔終於有得輕鬆吓，同曾太去紅館睇黎明演唱會，煲呔坐住特首座駕，由一架鐵馬開路，直駛入紅館玻璃門旁邊的停車場，然後由保安護駕入場，其間有啲入緊場嘅市民見到佢，煲呔曾都好親切咁揮手打招呼。一早到場嘅陳祖澤重特登喺紅館行返出嚟迎接佢。記得煲呔上一次睇徐小鳳演唱會，搵人封咗紅館一段路，等佢架車直駛入玻璃門口，因而被投訴，煲呔今次都算學精咗，自己行幾步。
煲呔噚晚入場之後，第一時間入後台同黎明打招呼；原來噚晚個演唱會係公益慈善夜，黎明身為公益金董事，佢間唱片公司東亞娛樂特登將噚晚演唱會部份門券收入捐畀公益金，約有五十萬。除咗特首伉儷，環境運輸及工務局局長廖秀冬同公益金董事余錦遠等都有嚟捧場。
傳真︰2623-9278
電郵︰[email protected]