吳國敬近日同排舞師Sunny及幾位圈外朋友，合股七位數字喺中環蘭桂坊開設酒吧Mooch，將於下月中開幕，佢噚日去咗酒吧睇裝修。
馮仁昭聽聞阿敬舊愛女優仲春菲已經喺加拿大結咗婚，重生埋仔，做咗媽咪㖭，阿敬話：「我都略有所聞，如果係事實就真係恭喜佢，我都想佢搵到幸福，不過我哋已經冇聯絡啦。」仲春菲婚後已有新生活，馮仁昭都好關心阿敬嘅感情生活，佢話：「感情嘅嘢都係等我事業有成先去諗，我𠵱家要專心搞好啲生意先。」
奉旨蒲吧攞經驗
而阿敬有份投資嘅酒吧，面積大約四千呎，佢話：「始終𠵱家個巿好番好多，大家都鍾意出去蒲，希望半年可以回本。」為咗知己知彼，百戰百勝，阿敬近排晚晚奉旨蒲吧吸取經驗。
問到阿敬重會唔會再作曲？佢話：「都會嘅，因為始終係我嘅興趣，𠵱家樂壇作曲搵唔到食㗎啦！不過我一有靈感都會寫啲好歌畀樂迷欣賞嘅。」