本港有史以來民望最高的曾特首噚日發表任內首份施政報告，雖然報告冇咩新意，講政治多於經濟，但淡友就認真唔畀面，大手沽期指，令恒指全日勁跌323點，收報14575，成交達249.72億元。
阿虎起初以為係份報告令到市場好唔高興，但睇番個市，早段表現好哋哋，但未能突破14950阻力後，大戶即反手掟貨，大市好快就跌破14600水平，呢種玩法與近日跌市好相似。
黑客話，市況偏淡令人心虛怯，長線基金對股市持觀望態度，對沖基金則睇中呢個弱點，一有機會就將港股大手質低，迫衍生工具發行商跟沽，然後在低位食胡獲利，呢種賺錢手法與看淡或看好大市應該冇乜關係。如果投資者真係看淡港股，抽水高逾700億元的建行，照計冇可能加價招股。
雖然明知市場唔鍾意供股，但位元堂（897）照供可也，1供3，發行10.4726億股，每股供0.15元，集資1.571億元。該股復牌後大跌29%至0.209元，成交308萬元。
佳邦有望浮水
佳邦（471）周一首日掛牌破底，較招股價低18.63%至0.83元，噚日逆市升12%至0.93元，成交達2205萬元，據聞此股有台資收集，有望向1.02元招股價邁進。
市場噚日傳出中石化（386）將向鎮海煉化（1128）提私有化，重傳到作價高達11.30-12.20元，受私有化消息刺激，鎮海股價逆市企穩，收報8.70元，升1.16%。
中石化早前已將北京燕化私有化，市場亦預期中石化陸續將旗下上市公司私有化，問題係幾時及出價是否闊綽而已。
阿虎