黎明一連六場的演唱會前晚踏入第二場，其間他在台上大歎知心不多，幸得長情fans支持，結果引得歌迷尖叫聲不絕，當他走到觀眾席握手時，更被熱情的歌迷瘋狂拉扯，險遭插眼！
黎明前晚假紅館繼續舉行《Leon演唱會CrazyClassic》第二場，全場爆滿。除黎明父親黎新生到場外，他的契爺胡楓及方力申等均為座上客。
由於前晚有中、台及東南亞各地fans拉隊捧場，故黎明十分識做，大唱慢板冧歌兼以甜言蜜語𠱁fans，令全場尖叫聲不絕。黎明在台上說：「我入行時間長，身邊朋友唔多，知己亦都唔多，數埋夠秤嘅，今晚有好多喺度。」這時fans已開始叫囂，黎明續稱有很多朋友雖已認識了一段時間，但因為環境影響而有所改變。他感歎地說：「有啲識得太耐，只可以飲飲食食；有啲朋友太聰明，學嚟學去都學唔到佢啲嘢，但做朋友應該係包容嘅。」
雷頌德出口術
其後嘉賓雷頌德出場，由於他在首場穿白衣與穿金色外套的黎明撞出「帛金」效果，所以雷頌德前晚特地改穿藍色條子外套，還幫腔為黎明冧fans說：「你嗰班係最warm嘅！同埋你喺紅館開演唱會，好似請班朋友返屋企食飯，好長情，去到呢個年代真係好難得。」黎明聞言便說：「我會用心去保持呢份情，因為我用好多苦功至可以維持到咁長嘅感情。」
兩人jam歌完畢，便進行握手會，又跳又唱的嘉賓杜汶澤與黎明各自走到觀眾席握手。經過黎明施展冧功後，fans更見瘋狂，一窩蜂衝到台邊，一時間逾百隻手在黎明頭頂此起彼落，幸黎明獲約八名保安員貼身護航，秩序尚算良好。
呼籲歌迷自律
事後問黎明與觀眾握手時有否被人插眼？他笑說：「冇，有保安員喺度呀嘛。」對於雷頌德換上藍色衫，黎明就說：「唔係驚唔老利，唔係特登嘅。」
此外，黎明所屬的唱片公司AMucis昨日呼籲歌迷自律，不要以手機或相機拍攝個唱片段。至於有報道指杜汶澤搶風頭，唱片公司指對方搞氣氛已是意料之內。
採訪：朱倬誼
攝影：何國豪
