劉德華舊年完成內地巡迴演唱會後，因為反應好好，今年內地好多地方嘅製作公司都搵佢再去演出，於是華仔喺九月份就展開中國巡迴演唱會第二部份，佢呢兩年成個巡迴旅程都係坐私人飛機，方便快捷又就佢時間。
宣傳連走幾地
華仔結束巡迴演唱會後，𠵱家忙緊宣傳新戲《再說一次我愛你》，要喺東南亞各地四圍去，華仔日前就去咗北京出席《再》片首映，跟住飛落重慶宣傳，然後再飛深圳宣傳，原來佢都係坐私人飛機。呢啲私人飛機係細機，但比一般飛內陸線嘅飛機豪華，叫做公務機，內地𠵱家只有十架呢類機，華仔都包到一架嚟用，認真威水。
呢類機坐到八個乘客，兩個機艙服務員，來回旅程嘅租用費要十五萬左右，但其實華仔搭一般民航頭等加啲工作人員嘅機票，條數都喺返度。華仔啱啱由北京飛去重慶，重帶埋《再》片女主角楊采妮一齊去，畀佢搭順風機，套戲老闆係華仔，如果要楊采妮搭民航機，啲錢咪又係佢畀，橫掂自己搭開公務機，所以叫埋楊采妮一齊坐，計落條數有賺㖭！
