林嘉欣出道四年，拍過十二部電影，除了sell演技外，還會sell甜美的樣子，不過嘉欣在剛完成了的電影《怪物》中，卻由靚變醜，造型相當恐怖。嘉欣表示如此大突破，除了想有新刺激外，也想滿足其自虐和變態心理。
林嘉欣拍攝電影《怪物》時，每天開工總要耗上九小時化特技妝，且每場戲都需要嗌到聲嘶力竭，令心情也受拖累跌到谷底，嘉欣表示拍攝時會當自己是怪物。
寧被讚變態
林嘉欣日前說：「由演呢個角色開始，我完全睇唔到自己，今次演得真係好痛苦，我連照鏡望到自己個樣都會喊，但我冇後悔，做演員就係鍾意自虐，折磨自己，得到快感，所以我寧願人哋讚我變態多過讚我靚。」
由靚女變醜女，嘉欣聲言只此一次，下不為例，她說：「呢部係我第十二部戲，之前演嘅十部都差唔多，我係想轉變，想有新刺激，我唔係編劇，要等機會。一年前我唔會接呢部戲，因為放唔低自己嘅靚樣，由細到大我都俾人讚靚女，但一路係咁會好攰，今次做醜女，個角色發揮好大。」
怕觀眾取笑
嘉欣續說：「我為部戲作出好大犧牲，如果入場嘅觀眾睇到我個造型覺得好笑，我會好傷心，𠵱家啲觀眾好醒目好腌尖，對特技化妝要求好高，覺得個樣唔似真，睇得唔夠投入就會當笑片睇，希望唔好笑我。」
採訪：魯萍
攝影：仇志德
化妝：WillWong
髮型：HinWan@IlCOLPO
服裝提供：A/TTsumoriChisato
