煲呔噚日話會授權政務司司長同財政司司長喺政策統籌同協調上做多啲嘢，扮演更重要角色，等佢自己專注政治工作喎，咁煲呔可能係空前唯一一個，兩個司長位都做過嘅特首，係咪絕後就唔知啦。所以佢肯分權，自然係分在可控制範圍內，唔驚你會起到飛腳。
其實煲呔唔使太驚嘅，因為唐唐隻腳俾蟲咬重未好番晒，一定飛唔起，加上唐唐噚日聽完煲呔演講，下晝去埋西班牙國慶酒會，晚上十點就去咗赤鱲角機場，真係成個人飛咗去三藩市同廣東省省長黃華華會合，一齊去推銷大珠三角。
唐唐位新聞秘書講，佢哋第一日會先會見美國商界，第二日會舉行一個大型嘅商業會議。噚日好多人都追問煲呔係咪唔搞銷售稅，佢話係財司嘅事，咁啱唐唐去咗美國，聽講佢返港後會詳細交代，包括幾時展開正式諮詢（或者唔做），叫八方唔使為此飛去美國問喎。
爆料熱線：29290000、27860099
報料傳真：26239278
報料電郵：[email protected]