好嘅唔靈醜嘅靈。諗住對沖基金會插多轉，話口未完，噚日佢哋又重施故技，中午過後，行情就有如倒水咁落，結果恒指收市又大跌323點，低收14575，成交更大增到249億元。
今次一插，雙頂頸線14734支持應聲而破，短期內如果上唔番去，後市都幾令人擔心。今次對沖基金造淡係全球性，主要係製造一種連鎖性效應，傳統基金暫時捱打。不過，收市後同班芬佬下午茶，佢哋對短期後市又唔係睇得太悲觀，普遍認為落到14300至14500，應該守得住，至於中期展望，睇好嘅立場並無改變。
金威集團（910）進軍植林業，收購一合資公司70%權益，噚日復牌，最高成17.5仙，收15.7仙，升5個位，喺噚日嘅大跌市中，能夠有此強勢表現，都算難能可貴，亦證明市場對金威今次收購有正面嘅評價。
市場評價正面
金威嘅收購，相比其市值同盈利表現，可說係「蛇吞象」，因為金威收購呢間合資公司，承諾其06年（12月年結）及07年兩年合計的盈利，不會少過2億港元，而其資產經獨立鑑定人評估並確認的公平市值不少於10億港元。金威04年度（6月年結）盈利僅逾3000萬元，成間公司市值不足5億元。
合資公司主要從事植樹、分銷木材及木漿等林業產品。點解公司咁把炮？咁好賺？咁值錢？內裏確係有文章。原來呢個係改造荒漠成為良田嘅高新科技項目，由中科院經過8年才研究成功，在寸草不生的鹽碱地，種植經改良的樹種──桑木枸樹，目前全國13.8%土地係呢種鹽碱地，面積相等於可耕農地，在此等土地上種樹，可說係廢「地」利用，成本極低；而更煞食嘅係，經改良嘅桑木枸樹，成長期由原來的8年縮短至1年，大大提升產量，此技術已於全球植物基因圖譜註冊專利。
目前全球造紙業原料供應緊張，中國更已禁止砍伐天然樹木，人工栽種桑木枸樹可提供大量木材予造紙行業，項目的發展前景極為樂觀。
8月中曾為文，指金威若能加快科技業務的產業化，自會令人刮目相看，今次進軍林業，相信會為股東帶來新的希望。
郭兆誠