「神六」順利升空，中國人之光，喜事也。煲呔曾宣讀施政報告，無驚無喜。港股大散323點，有驚無喜。恒指收14575，低過8月低位14734。中移動（941）與滙控（005），總共拉低159點，佔恒指跌幅1半。
交行C輪9249：建行今周招股，招股價範圍調高，市場心理覺得對交行（3328）有利。交行見過高位3.40元，埋單3.30元，仍有進帳1格，成交量則大增1.3倍。
交行硬淨，如果認為建行招股令交行繼續硬淨，揀C輪玩短線遊戲，可向9249埋手。隻輪明年2月初夠鐘，輪價21仙，溢價5.8%，槓桿率15.7倍（有效9.1倍），引伸波幅24.3%。
呢隻輪波幅大（昨日達28%），交投熱，睇錯市跳車亦非常容易。如果賭細細注，唔想太刺激，則揀9257。
新世界C輪9044：恒指33隻成份股，清一色下跌，排頭位係新世界（017），收9.85元，唔見4.4%。新世界C輪當然隻隻冇運行。新世界若再跌，跌到9.50元以下，搵C輪博反彈，揀9044，明年2月初到期，輪價58仙，溢價7.2%，槓桿率17倍（有效8.2倍），引伸波幅31.2%。雞仔注好嘞，唔雞仔注亦唔得，因為隻輪交投唔多。
章盛