煲呔噚日發表首份施政報告，一如所料，所有敏感題目都冇講，好似23條立法同埋港台公司化。咁畀你做特首，你都避重就輕啦。
23條等下一屆再算，有得連任就諗吓，否則連老董都唔敢掂，佢搞嚟做乜？至於港台呢個燙手山芋，八方聽聞，遲吓政府可能會有啲嘢講。
八方早前講過，政府因為計過條數，要用成二十億賠畀班公務員，所以一定唔會制，但係後來條數好似冇咁大，只需六、七億就掂，既然差咁遠，政府唔知會唔會再考慮吓，因為始終長痛不如短痛。
港台朱培慶哋當然最想有得傾，所以佢哋最近內部開過會，月底重會開公開諮詢大會，希望各界就港台何去何從畀吓意見。
不過，有高人就問八方，咁賠錢之後又如何呢？港台以後係咪可以自負盈虧，會否與民爭利？將來又會向邊個負責呢？咁特區政府重可唔可以管佢哋呢？
爆料熱線：29290000、27860099
報料傳真：26239278
報料電郵：[email protected]