十月九日會展中心有一個美國高等教育展覽，一流名校如耶魯、UPenn都在此擺檔，有啲出人意料之外。不過報紙報道，耶魯攤位乏人問津，唔知係唔係因為太難入學吖，還是攤位請咗外人看守，解答問題唔夠真切、投入。報紙話南加州大學攤位最熱鬧，整日人頭湧湧，南加大駐港辦事處主任梁起鳳與十幾位南加大校友非常落力招呼中學生，故此反應熱烈喎。
呢位梁起鳳女士，有來頭，佢爸爸就係星展銀行不倒翁賓架L，賓架L自大學畢業後就加入董家控制嘅道亨工作，董家將道亨銀行賣畀建利，建利賣畀豐隆，豐隆賣畀星展，三十幾年，經歷四個朝代，賓架L始終屹立不倒，越升越高級，𠵱家好似負責星展嘅信貸控制嘅工作，貴為董事級，真能人也。豐隆賣道亨之時，賓架L等一班老臣，賣出認股權，已賺到盤滿缽滿，大可退休，不過賓架L鍾意返工，日日早到遲退，樂此不疲，重有排做。
梁起鳳幼承庭訓，工作非常勤力，自南加大畢業返香港，就負責香港辦事處，與校友聯繫，向外推廣南加大，招攬叻仔叻女入學，順便籌款。近幾年唔少本地有名望之士送仔女去南加大，你估係意外咩。香港啲大學咪以為坐喺度就有優才上門入學，其實外國名校日日吼到實，搶奪人才係全球性嘅，如果有才兼有財，就更加畀名校搶到飛起。
世姪C考會考有五科A，諗住入本地大學全無難度，今年讀中七嘞，開學後突然覺得芝加哥大學經濟系好吸引，唔想讀本地大學。臨急臨忙跑去報考SAT，哈，點知今年試期與重陽節好接近，以往有七個考試中心，今年減為三個，世姪C突然報名，只可成為候補考生。佢唔死心，考試日晨早六點就起身，跑去試場門外，希望執雞（有學生不報到就輪到佢），但係香港考生好準時噃，百分百到場考試，世姪C失望而回，亦因此知道，香港不少中學生希望往美國留學，唔怪得美國學校要嚟香港搞一個高等教育展覽。