在杜琪峰執導的電影《黑社會》中，張家輝飾演一位既喪且狠的黑幫小人物，有場戲改編自真人真事，劇情講述張家輝不想被梁家輝看低，竟逞強吃掉一隻碎湯匙。觀眾看完千祈咪學！
由杜琪峰導演、梁家輝、任達華、張家輝及古天樂主演的電影《黑社會》將於下周四上映，戲中一場講述張家輝要在梁家輝面前逞強，將一隻瓷湯匙壓碎後吞下，有說這場戲改編自真人真事，由於片名和題材敏感，故引起警方高度關注。
警座談會正視聽
東九龍總區防止罪案辦公室經研究後，計劃在下月中舉辦一個座談會，對象是曾受警司警誡的青少年，希望透過座談會令他們了解加入黑社會的真正代價和後果。
杜琪峰開拍一部揭示黑社會最真實一面的電影，早已想到會引起爭議，日前他接受電話訪問時說：「警方高度重視呢部戲，我完全可以理解，但我想強調，呢部戲絕對冇歌頌黑社會之意，只係想用另一個角度去反映黑社會嘅真實面目。」
張家輝首日開工演出《黑》片時，導演就要求他拍食湯匙的戲份，張家輝接受電話訪問時說：「第一日開工，杜導演就要我食咗隻湯匙，以向梁家輝顯示『你要我食匙羹，你以為我唔敢食咩！我就食畀你睇，等你知道我都係喪嘅。』」
與古仔亦敵亦友
張家輝續說：「喺戲入面，我嘅角色性格其實好鮮明，係我既忠心幫會，又夠喪嘅小人物，同古天樂關係亦好微妙，似友非友，有時想殺佢，有時又會救佢，我拍呢套戲，其實過足戲癮！」
