煲呔參選時，有位女士成日陪住佢同曾太出出入入，嗰位就係米老鼠嘅太太、前《南早》政治編輯黃麗君。
黃小姐做記者之時，已經有「小辣椒」嘅外號，咁佢間公關公司為煲呔競選成功，當然有人猜佢會更上一層樓，做官去也，咁新聞統籌專員咪啱晒佢做囉。點知有人問芬妮（黃麗君嘅英文名），佢猛話自己冇份，睇怕煲呔要落多啲嘴頭喇。
芬妮係中大畢業生，呢期《中大校友》有簡單介紹佢阿姐近況，不過唔明點解會落錯相，嗱，左手邊陳德霖張相前面嗰位小姐就係黃麗君啦。梁天偉大師兄真係要小心睇實啲。
噚日煲呔一日走幾場，佢個辦公室嘅人都跟到實，包括即將去接替眾人媽打李麗娟嘅黃灝玄、私人秘書丁葉燕薇以及新聞秘書陳羿。
至於新聞處處長蔡瑩璧，做埋呢場之後就應該要調位，因為新聞統籌專員個位冇佢咁高級。
爆料熱線：29290000、27860099
報料傳真：26239278
報料電郵：[email protected]