昨日大市又失驚無神大跌300幾點，有人就賴特首施政報告，亦有人話因為日本股市影響。
嘉華國際（173）同嘉華建材（027）一對孖寶，昨日在濠賭股中跌勢明顯，阿媽跌5.89％，收2.075元，成交金額3014萬元。至於阿仔亦跌4.41％，收4.875元，成交金額4361萬元。
經紀陳話，嘉國向股東派發嘉建股份，剛好噚日除淨，亦照計就算跌都好，都應該係嘉華建材股價下跌，皆因送股令街貨流通量多咗，但嘉國就算係除淨，照計亦唔使跌咁多，唯一解釋就係濠賭股已經今非昔比。
查實除濠賭股外，先一排都炒作過一輪大陸彩票股，亦只係熱鬧過一陣，好似看通（1059）批完股之後，當堂靜到冇晒影。不過，經紀黃就仍然力撐即將改名嘅金屬電子交易所（8161），話隻股除咗芬佬捧場，亦獲得一班大陸炒家全力支持，如果唔係點會到家陣仍然企硬喺2元樓上？
金屬電子交易所昨日升2.22％，收2.30元，成交股數465萬股，金額1078萬元。
慕容小初