黎明的紅館個唱前晚揭開序幕，嘉賓雷頌德身穿白衣亮相，與披金衣的黎明在台上jam歌，為怕白撞金變「帛金」唔老利，黎明竟即場剝衫。而另一嘉賓杜汶澤則代黎明訴心曲，卻嘲對方唱歌走音及拍戲不認真，又指黎明緋聞有啲係真！
黎明一連六場的演唱會前晚在紅館開鑼，總共換了七套衣服的他以唱慢歌居多，又沒有跳舞，換衫期間則有汕頭魔術雜技團演出；而嘉賓杜汶澤更三度出場搞氣氛，不過全晚高潮仍是黎明邊唱歌邊到台側跟歌迷握手，場面混亂。
扮Rain跳舞搶鏡
杜汶澤吊威吔踩着單車從天而降，代黎明盡訴心中情，他說：「我叫黎小明，我成日走出嚟，大家唔係好認得我，你哋留意嗰個係黎老明。」「黎小明」續稱轉瞬間過了有喜有悲的二十年，他說：「俾人話我唱歌走音，拍戲唔認真，我係有少少唔開心。」這時杜汶澤踩單車落地時卻不慎被威吔繩絆倒，但仍繼續說：「但都係開心嘅，好似捐錢去公益金，跳bungeejump（笨豬跳），拍陳可辛，扮黎小軍（黎明在電影《甜蜜蜜》中角色），但係我未結婚，啲人成日話我追女仔好叻，你估我係杜汶澤同雷頌德咩？佢哋咁肥、咁嘅樣，但係我都同好多女星傳過緋聞，有啲係真。」
觀眾聞言即起哄問「邊啲呀？」，杜汶澤即大耍太極說：「至少我覺得係，冇所謂，做呢行，冇做過會屈我做過，你對人好，人哋未必對你好，不過我從來冇諗過還擊。」其後杜汶澤再出場游說黎明跳舞，但被婉拒，杜汶澤即扮韓國歌手Rain摸心口跳舞。
而一身白衣打扮的雷頌德亦跟黎明jam歌，穿金色西裝的黎明說：「你係咪專登着白色嚟撞我金色？我將件褸除咗先，費事白撞金，變咗『帛金』。」語畢即脫褸，雷頌德即說：「未識你之前，麻麻哋鍾意你，睇外表咁嘅樣，但估唔到你做藝人咁率直，雖然嗰時我好憎你，但呢首可以再唱。」接着二人合唱一曲。
捧光良踩阿Mark
黎明與嘉賓光良合唱《童話》後，大讚光良有音樂天份，還自稱沒天份作歌，但又乘機踩雷頌德說：「阿Mark（雷頌德）寫咁多歌，佢唱歌就……sorry呀！」
對於杜汶澤在台上代訴心曲，黎明說：「唔知道，大家冇度過，佢鍾意點講就點講，佢講嘢時我冇聽到，換緊衫。」至於對方談及其緋聞，他說：「吓？呢個世界上實有啲係真，咁先有新聞，真實嘅data（資料）唔需要回應。」杜汶澤指黎明待人好不代表人待他好，問黎明是否屬實？他說：「呢個世界上有啲係天意、緣份安排，有啲朋友幫你，有啲累你，令你自己害自己。」問他是否被人害過？他說：「不構成一個新聞，That'sme，Leon，我唔係上市公司，私人生活唔需要report（報告）。」
「黎明油頭粉面」
杜汶澤則表示學Rain跳舞是因為太太田蕊妮，他說：「老婆叫我學阿Rain跳舞畀佢睇，睇完佢叫我去死，大佬呀，佢係阿Rain，你估係李彩華（英文名Rain）咩？」他表示以前覺得黎明油頭粉面，相熟後見過對方最真的一面，問他知否黎明現在的感情生活？他說：「我睇佢就冇，我睇佢真係好似好dry。」
採訪：駱華齡 攝影：何國豪
