港股周一成交縮至137.13億元，聽講係因為同唔少芬佬放假有關。事實上，芬佬只要請1日假，就可以連放4日，足夠到東南亞度假。
芬佬充完電之後，唔知港股今日復市會唔會好番啲。周一恒指曾升破14900，最高見14933，但之後買盤無以為繼，全日收報14898.77，升50.98點。
黑客話，話就話因為唔少芬佬放假，令港股周一買盤無以為繼，其實個市有啲似上周跌市時嘅走勢，當恒指升近技術阻力位時，淡友便大力出貨，將個市質低。建行及領匯即將上市，抽水逾千億元，加上近日有資金流出香港，市場承接力及人心都相當虛怯，淡友仍會伺機出擊，港股可能未跌完，博反彈要小心。
建滔傳大戶沽貨
建滔化工（148）周一有兩宗大手成交共267.25萬股上板，每股作價19.299元，涉及資金5157.66萬元，股價一度跌破18元，低見17.55元，最後收報18.65元，跌3.11%。
Cookie話，傳聞話有大戶在上次配股時，以每股22.25元接咗貨，現在認輸止蝕。
隆成（1225）上周遭惠理基金悉售4111.2萬股，相當於5.7%股權，但消息公布後，周一股價都唔識郁，收報0.58元，冇起跌，成交只得14.11萬股。
據講呢批股份已被有心人士接下，短期之內都唔會流入市場，沽壓將消除，所以唔使驚。
隆成股價今年走勢一直疲弱，由高位1.35元累跌逾50%，從未有過明顯反彈。不過，據聞有心人稍後可能伺機將股價炒高，但就要睇埋天時地利人和。
阿虎