今年係明朝三保太監鄭和下西洋六百周年紀念，為表揚鄭和喺中國航海事業上嘅成就，內地中央台籌備多時嘅四十集大型歷史劇《鄭和下西洋》已經喺北京秘密開鏡，馮仁昭知道羅嘉良以港星身份成功出線，出任第一男主角演繹鄭和呢位傳奇人物，可算為香港演員增光。
中央台向來對歷史劇十分重視，過往大多起用內地演員孭飛，港星要出任第一男角確唔容易，但因嘉良以前主演嘅無綫劇集喺內地不時重播又重播，演技備受賞識，演齡深、具經驗再加上喺內地富知名度，所以獲得中央台青睞。
刨定史書
嘉良今次係劇中唯一港星，同嘉良有最多對手戲嘅就係飾演永樂大帝嘅唐國強，唐國強係內地一級演員，最為人熟識嘅演出就係喺《雍正王朝》劇中飾演雍正；而另外一位佔戲甚多嘅內地男演員，就係曾演《大宅門》、被喻為國寶級嘅內地資深演員杜雨露，所以呢次嘉良同內地名演員大鬥演技亦不敢怠慢，聽聞佢喺開鏡前幾個月已經刨定有關鄭和嘅史書，做好準備工夫。而今次整個拍攝期長達半年，預算最快明年中推出，但今個月尾會率先喺北京舉行記者會公布詳情。
