昨日日股大發神威，勁升328點，但港股重陽假期休市，周一買咗貨博反彈的投資者相信都會幾激氣。不過，敢在周一買貨博反彈的散戶應該唔多，單睇周一港股成交大縮至137億，就知道投資者大部份已離場。
日股上周自高位13784回落至最低13221，調整563點，但昨日單日已收復3百餘點失地，雖仍未補回上周四的下跌裂口13555-13656，不過以昨日由頭升到尾所形成的特大陽燭，短期要補回裂口及再破近期頂部13784並不太困難。
不過，這並不代表趙飛雲轉軚看好日股短期後市。經驗所得，升浪愈是升得長，大戶派貨需時愈多，經常由高位先質低一輪，然後抽高再派，在正式下跌前，大多會出現M形或多頭的走勢。但日股短期回升，則有助港股反彈。
至於美股則繼續尋底走勢，上周五輕微回升5點後，周一再跌53點，收10238，距1萬關愈來愈近，危危乎的感覺愈來愈強。
外圍走勢本周可能出現突破，需要昅實，其實趙飛雲希望睇錯外圍市，咁樣港股就不需再作進一步調整，大家都會開心一啲。周一提過中移動（941）近50日線（34.80元）可以博反彈，但隻股當日成為升市的主要動力，升0.25元至35.60元收市，距20日線阻力36.25元不遠，短線值博率不大，所以並無買入。
另一隻提過9元現支持的信和置業（083）亦升0.15元或1.64%，收9.30元，但距買入目標價9元有些少距離，故此亦無買入。
9元附近買入
睇好信置的高盛重申，信置無意配股，並因近期「一號銀海」熱賣，將06及07年度盈利預測提高24.6%及19.7%，並將目標價調升至10.75元。由此看來，近期最有博反彈瞄頭的地產股應是信置，9元水平低吸無妨，高追則無謂。
趙飛雲