呢頭話有紙業公司搞上市，理文造紙（2314）周一即見異動，一來係班分析員睇好佢嘅盈利前景；二來係紙漿價格雖上揚，但好彩理文造紙喺年頭收購咗間美國紙漿廠，既可確定有足夠紙漿用，有剩嘅話又可以出售獲利，所以盈利前景可以睇高一線。
理文造紙周一曾升上8元高位，股價創52周高位，收7.80元，升4％，成交股數137萬股，金額1072萬元。
經紀黃話，外間見理文造紙咁銳意發展，尤其係重慶第8號生產線又話就快落實興建，公司年年投資金額都話成幾億元，雖然發展計劃以銀行融資為主，但若果股價持續靚仔，相信好快會有證券行埋嚟問佢批唔批股。
另外，建滔化工（148）周一日又再上演驚險場面，早上出現兩手共2百幾萬股嘅大成交後，股價就開始下跌，最低跌至17.55元，收報18.65元，仍跌3.11％，成交股數503萬股，金額9485萬元。
經紀黃話，芬佬家陣對負債有番咁上下嘅工業股，仍然抱住懷疑態度，所以一有芬佬唔玩，建滔就會有呢類場面出現。
慕容小初