港股跌後反彈，暫時有頗大機會重新以橫行方式去完成今次調整。對沖基金今次出手，殺個好友措手不及，一質就質低近600點，冇得講，世界上冇一個股市有香港咁自由，對沖基金計過條數，贏面大嘅，就全面出擊，結果就連傳統基金都要投降，質埋一份，間接重助咗對沖基金一臂之力。
大市落番14800水平，對沖基金會點做？會否食髓知味，重施故技，再插低500至600點，睇形勢，應該唔係咁易；至於再推低200至300點，略為跌穿14734的雙頂頸線，可能性則不能抹煞。
國企跌後回升，石油股同原料股嘅表現比預期有力，有助恢復投資者信心，對穩定整體市勢亦可起到作用。中鋁（2600）升得最勁，高收4.725元，升0.20元，若升勢持續，成交顯著增加，則調整完成，目標價5.60元。
有意集資注入鋼鐵廠
益安國際（082）收購五礦營口中板鋼鐵廠，始終欠臨門一腳，市場憂慮其收購行動會功虧一簣，所以，益安股價就一路係咁跌，毫無起色。不過，近日有消息，指其「披成」集資嘅行動已有進展，有幾個買家對呢手貨（成7億幾銀）好有興趣；與此同時，益安嘅股價亦由低位0.40元回升到0.53元。
益安收購鋼廠，賣家接收益安股票作價係0.52元；而益安早前講過，要做「披成」嘅新股，作價視乎市況而定，但不低於0.60元，或不高於市價兩成以上折讓，二者選較高者。以現時情況看，益安能以0.60元做成「披成」，已經上上大吉，而「披成」價高過鋼廠賣家嘅接貨價，亦係合情合理。做完呢個「刁」，籌集7.8億元，注入鋼鐵廠進行第2期擴產工程，益安嘅收購先可以話大功告成，股東始可以放下心頭大石。
營口軋鋼現時產能係200萬噸鋼坯同120萬噸熱軋中鋼板，鋼廠二期擴建完成後，中板產量可提升到200萬噸，估計07年（12月年結）益安應佔盈利逾5億元。
「披成」若能完成，益安股數將上升到25.2億股，以作價0.60元計，07年預測PE只係3倍，即使股價再翻一番，PE亦僅6倍，仍比現時同業具有吸引力。
郭兆誠