上星期日講大班教導下一輩人物，自己再睇番專欄，都覺得好笑。自己幾時先知道請客主人（host）嘅餐牌有價錢，客人餐牌冇價錢嘅禮儀呢？諗咗一輪，回憶番二十四年前到耶加達call客，見銀行客戶，客戶係印尼大銀行之一，盡地主之誼，請左丁山到耶加達一家餐廳，叫做Oasis食晚飯，呢間餐廳位於百年前嘅外國使館，有大廳及花園，甚有氣派，離開文華東方酒店十零分鐘車程，出入都幾方便。
左丁山大鄉里，夥計派來餐牌，一睇，冇價錢嘅，主人家微微嘴笑，請左丁山點菜先，一時不知如何是好，驚住食得太貴嘅話，欠主人一個人情，你知啦，老實賓架好驚俾人唱貪飲貪食，出外應酬必須小心也。唯有點個羅宋湯，燒春雞，諗住一定唔會貴得去邊。呢間Oasis當年晚晚爆滿，食物水準一流，氣氛又好，有一支來自蘇門答臘嘅三人樂隊加一位老鋼琴手演奏，唱民歌及印尼民謠，好聽到震。
之後每去印尼耶加達，左丁山必定到Oasis一次，耶加達呢個大城市，平平無奇，冇一樣事物對香港賓架有吸引力，到耶加達而唔去Oasis食餐，簡直係浪費時間。去過幾次，就知道價錢喇，唔算太貴，大約等於香港嘅「占美廚房」，不過計番生活指數及GDP水平，印尼人一定覺得Oasis貴得離譜。
已經有十八年未去過印尼，Oasis唔知執咗未，現在印尼局勢似乎比當年蘇哈圖獨裁之時較為亂一啲，治安唔知點樣呢？當年住在鬧市中心區文華東方酒店，的士出入，食完飯返到酒店就唔敢出街，一位新加坡賓架與左丁山在酒店酒吧內飲酒，佢話覺得好悶，要出街行吓，環繞酒店行一個圈。半個鐘頭後佢返番嚟向酒店職員求救，原來佢手腕上嘅勞力士表已經俾人搶咗！