有次茶敍，朋友嘅朋友話，大半年冇糧出。失業乎？老闆無良扣糧乎？通通唔係，而係啲出糧銀両全部進貢畀窩輪市場。又有1人話，炒輪者性格，必須「視死如歸」。閒話幾句，聊博一粲。
重陽假日，港股昨日冇市。日股則由開市13280，到收市升到13556，全日彈跳329點，入市原因係日本經濟曙光大露，銀行股領漲。
恒指C輪9252：港股經上周大散之後，如果外圍唔再有事，應該定得番，反彈一二百點唔出奇，吼恒指C輪買。如果注碼唔大，吼9252，明年2月尾夠鐘，輪價14.5仙，溢價5.3%，槓桿率30.2倍（有效14.1倍），引伸波幅15.8%。隻輪比起同期C輪，交投較遜。想1個鐘頭轉幾次身，則選其他交投熱鬧者，畀高些少溢價。
新地C輪4904：新地（016）散得幾淒清，過去5日唔見3.70元，博反彈1/3，可以諗吓C輪埋手。
4904過去5日大散1半，收18.4仙，明年1月夠鐘，係熱門新地C輪，贏與輸，見功快。正股郁1元，隻輪升跌理論幅度係13%，都算夠刺激。
章盛