今年黃金周因為被冠上「超級」兩個字，反而嚇親班內地同胞唔敢湧落嚟香港，搞到既唔旺丁又唔旺財，好似莎莎國際嘅老闆郭少明，噚日就呼籲旅遊業界搞多啲新意思，吸引多啲旅客來港，唔好齋靠黃金周。
郭老闆自己亦唔係得個講字，就好似佢知道大陸同胞鍾意嚟香港睇賽馬，於是贊助嚟緊個禮拜日舉行嘅婦女銀袋賽，成為首間企業冠名贊助呢項一年一度嘅盛事。
除咗吸引旅客嚟香港，做零售業有好嘅服務自然留得住班客仔，所以佢又訂咗十二月二十八號迪士尼酒店十間靚房，用嚟獎勵優秀員工。聽聞喺黃金周期間，莎莎尖沙嘴加連威老道嘅分店有位員工，做咗一張達四萬八千蚊嘅單，成為最高開單紀錄；八方問郭老闆，呢位肯定係優秀員工，睇怕實有份去迪士尼，點知郭老闆話，佢份佣金已夠和味，優秀員工唔止係做到大生意，最重要服務好。下次拍推廣零售業服務態度廣告，除咗搵劉德華，大家不妨考慮搵郭老闆。
爆料熱線：29290000、27860099
報料傳真：26239278
報料電郵：[email protected]