古巨基、楊千嬅同許志安獲選十大傑出青年，但好多人都質疑佢哋嘅得獎資格，城市大學應用社會科學系嘅黃成榮博士接受報章訪問時，話楊千嬅得到傑青尚可理解，因為佢多年嚟的確為慈善付出好多，尤其宣傳預防愛滋病嘅訊息出過唔少力。
但黃博士就質疑基仔同安仔點解可以攞到傑青，佢話：「我覺得非常奇怪，我諗公眾有唔少人都同我諗法一樣，我覺得佢哋出席慈善活動好似做騷宣傳，係唱片公司教佢哋建立健康形象嘅方法。」
而基仔噚日喺廣州舉行記者會，宣傳下個月五號喺廣州越秀山體育場舉行嘅演唱會。對於被質疑獲選傑青嘅資格，基仔話所有候選人都經過評審，重話好開心得到認同。
Ba嫂代夫出征
基仔呢個騷係陳達志（Ba叔）製作，但早排Ba叔俾廉署拘捕，雖然獲准保釋候查，但噚日唔見佢出席記者會，淨係得Ba嫂到場支持基仔。
另外，基仔近日幫可口可樂嘅iCoke.hk拍廣告，當日基仔喺泳池拍外景，吸引唔少泳客圍觀。
