日本昨日冇市，港股自由浮動，恒指埋單進帳50點。藍籌股最醒嘅係華創（291），升4.5%，收報12.70元。
華創C輪3431：華創改變業務路線，專攻消費品行業。大行出報告，話佢嘅路線正確，畀買入評級，華創股價，咁就由12.15元彈上12.70元。
華創C輪唔多，1隻手掌數晒，3隻有成交，兩隻冇買賣。最多成交嘅係3431，金額5球半，亦係最正路嘅華創C輪。隻輪收20.3仙，升13%，明年5月夠鐘，溢價4.2%，槓桿率6.3倍（有效4.8倍），引伸波幅28.7%。
華創過去兩個幾月，大部份時間喺12元與13元之間上落，𠵱家接近波幅嘅頂部，恐怕水位有限，最好等回到12元邊邊，先至搵C輪買，對象就係3431。
晶門C輪9619：晶門（2878）單日升8.9%，收報3.075元。撞啱有讀者傳書問晶門C輪9619聽講有人話好，問買唔買得過。
答案係買唔過。
隻輪明年3月尾夠鐘，輪價77仙（昨升20%），有5個幾月命仔，溢價17.7%，好似唔算離譜。睇埋槓桿率只得4倍（有效更只得2.7倍），而引伸波幅又高到79.7%，除非認為正股成日彈彈跳跳，否則點買得落手？
章盛