中大法律學院終於成立，並且準備喺明年九月起招收第一屆新生，有學士、碩士同博士課程，法學院籌委會主席梁定邦當然最高興，中大一直標榜係一間綜合大學，冇法學院始終有啲唔似樣。
噚日梁定邦同中大副校長廖柏偉以及法學院主任麥高偉教授同記者食晏，介紹新學院之餘，八方梗係問吓梁主席點睇律政司司長大熱黃仁龍，因為好多資深大律師私下都覺得呢條「皇仁之龍」比較後生，只係四十出頭，未必夠老練。
不過，梁定邦就有唔同意見。佢重用番法律條文嘅制訂要做好多取捨嚟作比喻話，「煲呔揀邊個都要有取捨，因為冇百分之一百嘅完人，最緊要委任一個同自己夾嘅人，同聲同氣就有得做，年紀唔係問題。」
梁定邦當然有資格品評，佢既係資深大律師、又做過AO，又做過香港證監會主席、中國證監會首席顧問，又係中銀獨立非執行董事，更曾經係律政司司長以至第一屆特首大熱門人選，甚得中方信任就唔使講啦。
對梁定邦嚟講，做律政司司長最緊要有專業威信，以及有良好嘅個人操守。咁黃仁龍點睇呢？佢冇直接講，但係記者一翻中大法律學院策劃委員會成員名單，竟然發現龍哥代表大律師公會做委員會成員，即係中大有眼光啦。
高人贈十二字真言
其實就黃仁龍嘅任命，八方都問過一啲行內資深人士，得到十二字真言，就係：「正人君子、政治中立、斯斯文文。」睇嚟都符合梁主席講嘅要求。
咁如果傳聞成真，中央真係接受煲呔提名，Anthony（梁定邦英文名）同廖柏偉都希望龍哥留任中大法學院策劃委員會，呢個就可能有啲難度，要等煲呔發落。至於對個新政府點評價，梁大狀就話未清楚，要等埋聽日發表嘅第一份施政報告先知。
中大搞法律學院，要同百年老店嘅港大爭一定好難，不過，佢哋話會有新方法，就係唔係淨係要學生背死書、讀條文，而係同佢哋講案例，用哈佛同耶魯嘅方式教學生，實行同社會結合，注重通識，發揮由錢穆大師一脈相傳嘅人文精神，又真係好偉大喎。
唔講唔知，原來中大關於中國法律嘅藏書之豐，連北大、清華同美國國會圖書館都比唔上。中大法律系雖然係新成立，但係以前就有好多人贈書，加上楊鐵樑八八年已經喺校內成立中國法律研究中心，所以好有淵源。
為咗吸引學生興趣，麥高偉準備搞個網上猜詩遊戲，畀全港各中學參加，當然係同法律有關，中大會按成績排名，睇吓邊間學校啲學生醒啲喎。
爆料熱線：29290000、27860099
報料傳真：26239278
報料電郵：[email protected]