肥龍聽英雄樂曲 - 左丁山

肥龍聽英雄樂曲 - 左丁山

西九文娛藝術區發展大計,卒之曝光,最大轉變係從單一招標變為中標財團主導。齊齊分餅仔,曾特首放棄單一招標,顯然係政治讓步,至於讓得夠唔夠,是否可以平息反對派嘅噪音,有待下回分解。
政務司司長許仕仁畀蘋果叫做肥龍,於是肥龍之名不脛而走,肥龍返回政府做政務司司長,確實個人犧牲甚大,譬如(一)減薪一半以上,(二)只做兩年,做完司長唔會再上一層樓,(三)忙到不可開交,完全冇時間去外地睇歌劇,冇晒癮。聽講佢點都會抽出時間於十一月十三日,到文化中心聽柏林愛樂樂團,門票二千幾蚊一張,肥龍一於冇計,(四)難以抽空去馬場,冇咗馬會董事做,係精神損失;(五)曾特首派畀佢嘅三大任務,件件麻煩,如西九文娛藝術區、政制改革方案、檢討日後區議會之角色及培養政治人才。搞任何一件,都會成為箭靶,何況兩年之內搞齊三件?
如果肥龍逐單交貨,擺平各方,簡直係本港最高思考能量嘅政治天才,若然如此,○七年後佢又歸隱,香港特區政府損失咪好大?跟佢嘅新聞秘書都損失好大㗎,關太做機管局傳訊總監,做得好好地,人工高,冇頭痛嘢,算係企業傳訊界嘅筍盤,點知舊老闆肥龍成為政務司司長,吹響號角,得力舊部要歸隊,關太唯有辭去機管局之職,追隨左右,人工降低唔在講,份工最長只得兩年,你話幾蝕底吖!
肥龍係歌劇、古典音樂發燒友,對音響嘅要求,認真到極。佢去文化中心聽柏林愛樂樂團演奏貝多芬英雄交響曲(第三交響曲),如果坐在地下大堂中座,可能會聽到撞火,因為文化中心嘅音響效果不平均,政要人物坐嘅大堂中座,每每聽唔清楚,肥龍如因此決心建設西九龍,拆咗文化中心,未必唔係好事。