噚日係雙十節，台灣駐港最高機構中華旅行社特別喺灣仔君悅大酒店舉行雙十節暨辛亥革命九十四周年酒會。八方都有去捧場，遠遠就見到中華旅行社總經理鮑正鋼同光華新聞文化中心主任路平喺度迎接賓客。一向都鍾意着露肩裝嘅路平，自然以一貫戰衣上陣，加上佢嘅嬌媚，受到好多男士歡迎。
民主黨噚日都有好多人到場，計有主席達仔、前主席馬丁、涂謹申、單仲偕同遲到嘅肥仔明，都算好畀面。其他到場人士重有卿姐，政府高官就一個都冇到。
白鴿黨一到場好受注目，唔少與會者主動同佢哋打招呼，其中馬丁最受歡迎，事關佢去到邊，都有人拉住同佢合照留念，呢啲咪叫做政治魅力囉。
眾所周知，馬丁嘅普通話一向都係麻麻；點知佢噚日以為自己只係嘉賓，可以滿場飛同啲老友記聚首一堂，冷不防台上竟然有人叫佢致辭，嚇到佢即刻猛話大鑊。結果佢上到台都自認普通話唔掂，所以都係用廣東話講幾句穩陣啲，而內容當然離唔開○七○八年普選。
馬丁噚日同八方傾起黃仁龍，話佢好受法律界人士尊重。佢重話只要唔損害香港人權，佢都會支持23條立法；至於係咪黃仁龍任內重推就有信心啲？馬丁都冇乜點答。
另外，噚朝有多個親台組織去到屯門青山紅樓舉行雙十節慶典活動，令到現場青天白日滿地紅旗幟飄揚。
爆料熱線：29290000、27860099
報料傳真：26239278
報料電郵：[email protected]