國際雷利計劃前兩日搞咗個「雷利衛徑長征」行山比賽，政協黃英豪係香港雷利嘅贊助人。參賽者要行晒衛奕信徑，由香港黃泥涌行到接近沙頭角嘅南涌（中間搭地鐵過海），全程七十八公里，雖然比毅行者短，但因為路程既山多、又成日要急上急落，挑戰性比毅行者重高。
有參加者同八方講，啲義工重好似多過參賽者，雖然班義工好落力，但都係冇乜比賽氣氛，而且啲路標設計得唔好，唔少分叉路、騎呢位都冇指示，加上比賽又少人，入夜想搵其他參賽者問吓路都難，都幾容易蕩失路。
年年大把人爭住抽籤玩毅行者，但「雷利衛徑長征」就少人問津。其實呢個比賽都已經搞咗一段時間，但認知度就真係麻麻，睇嚟身為贊助人嘅黃英豪，唔好以為出錢就得，重要做出多啲力，做多啲宣傳，最好搵多幾個政協一齊參賽，由腳痛好番嘅政協副主席老董帶隊，咁就夠晒噱頭喇！
傳真︰2623-9278
電郵︰[email protected]