由於上周大市突然急跌，所以有啲原本認購反應唔錯嘅新股，出現抽飛現象，先前話上市會熱炒嘅永樂電器（503）都傳出唔例外。隻股將於本周五掛牌，但近日有人唱淡，話買永樂不如買國美（493），因為國美規模比永樂大，生意又好啲，相比之下，永樂一啲都唔平。
小初記得，早排永樂搞推介之日，正好係國美股價被質之時，國美股價最低曾跌至3.95元，但呢排就升番唔少，上周五又升3.19%，收4.95元，成交股數123萬股，金額594萬元，幾乎重返未跌前之水平。投資者轉軚速度之快，有時真係估唔到。
經紀黃話，由於永樂有大摩照住，所以早排被看高一線，但芬佬睇清楚之後，就有第二種諗法，大陸家電銷售市場競爭愈來愈劇烈，而永樂主要市場在上海，競爭就更加大，毛利相對亦較低。相比之下，國美經營日子較長，分店覆蓋城市亦較多，甚至二線城市都有據點。雖然國美同樣面對強大競爭，但兩者選其一，芬佬覺得國美應該好些少。
慕容小初