多個台灣駐港機構同本地僑界社團組織，噚日率先舉行慶祝雙十節暨辛亥革命九十四周年酒會，大會除咗播放孫中山先生史迹外，在場近千代表都向其遺像行三鞠躬禮，以表敬意；與會人士重特別獲發一個雙十扣針，好有紀念價值。
除咗中華旅行社總經理鮑正鋼外，立法會議員陳偉業都係主禮嘉賓之一。原來大嚿係第一次主禮雙十活動，佢致辭時就講到，自由民主未喺全中國土地上落實，希望大家繼續努力。
大嚿一向同鮑正鋼有偈傾，不過噚日可能太多人，所以冇時間再同鮑正鋼討論港、台關係。而鮑正鋼就梗係貫徹佢嘅低調作風，致辭時只講及香港係兩岸之間嘅一個橋樑，希望三地人民生活更好云云，冇提及幾時再安排小馬哥來港訪問，真係令一眾小馬哥fans失望。
傳真︰2623-9278
電郵︰[email protected]