港股上周走勢逆轉，由高位15493大幅回落，連續兩日裂口急挫，3條短期平均線失守，全周下跌580點，成交亦大增。
大市由8月中高位15509開始的調整，暫時低位係8月底的14734，幅度不足，時間亦未夠；由於市底強，預期大市會以橫行方式來完成今次調整。9月底的抽升，衝破15310的阻力，但上到15500水平又乏力再進兼且掉頭急挫，顯示調整市未完，暫時支持位係14734，另一個更有力的支持位係14527，調整上一個升浪（13921至15509）的0.618。
大市急挫，而早前已暴跌的泛海酒店（292）則在0.28元獲得支持。一家公司的股價，在經營環境繼續向好之際，竟然可以在1個月內，由1.94元的高位大幅滑落到0.26元，跌幅高達86.6%，其跌勢之急，同之前3個月升勢之「無厘頭」（由0.56元升上1.94元，升幅246%），同樣令人大開眼界。
股價折讓33%
1年前，泛店股價就係0.25元至0.28元，過去1年，經歷了一段過山車式的驚險旅程（慢慢拉動上高位後急速滑落），家吓股價重遊舊地，即係未升過，而好多酒店股喺1年間都錄得唔小的升幅，相比之下，泛店家吓又有番「投機」價值，酒店股而用「投機」兩字，只係話明其短期反彈嘅幅度可以好大，但風險亦一樣好大。
泛店主要資產係3項酒店物業，包括：1灣仔皇悅酒店，樓面18.4萬方呎，客房360間；2九龍皇悅酒店，樓面22萬方呎，客房315間；及3加拿大溫哥華EmpireLandmark酒店，樓面42萬方呎，客房358間。今年3月底，3間酒店估值共33.13億元。
泛店資產淨值22.23億元，每股帳面資產淨值0.44元，現價0.295元，折讓33%。股價1.94元較資產淨值高出3.4倍，係不切實際，現時急跌到有折讓，亦同樣係唔合理。泛店如果跌完並回升，反彈幅度應該會幾可觀；若然反彈跌幅的0.236，股價已可重上0.65元。
本港酒店業好景，泛店兩間酒店入住率亦高企在約90%水平，現年度PE可降至低雙位數，進可攻、退可守。
郭兆誠