美股上周五喘定，中移動（941）ADR價好過本港收市，如果作為港市指標，港股暫時可望定得住，恒指再大散機會唔大。
太AC輪9053：1周統計，紐約期油跌價7%，美國能源股1周跌幅，係3年幾以來最大跌幅。如果認為油價已見頂，想喺油價下跌過程中搵食，表面上期油P輪可以諗吓（有4865、4924、4884、9348與9350），但大多數過於價外、數據唔靚、冇乜成交、買唔落手。
航空股係油價下跌得益股份，但冇乜C輪可揀，數據唔靚。
太A（019）有航空股成份，不妨望多兩眼，9053係正路對象，明年2月尾到期，輪價33.5仙，溢價6.7%，槓桿率21.2倍（有效10.7倍），引伸波幅20%。隻輪溢價唔算低，炒作宜短不宜長，坐貨太耐蝕溢價，蝕時間值。
和黃C輪9137：和黃（013）成日有新聞，股價唔會企定定，好短時間內上落1-2元，啲C輪自然上落好快。吼和黃跌，低買C輪9137，升則獲利回吐。例如40仙以下上車，接近50仙嗰頭落車。碰啱市況波動，一兩日間已可完成買賣。
章盛