唐英年司長心直口快，一語道破黃仁龍係梁愛詩接班人，傳媒當然讚賞，但呢單嘢引起嘅迴響就好大。
第一，傳聞黃仁龍嘅任命，中央尚未正式批覆。雖然，以煲呔現時個勢，如果佢推薦，北京冇理由唔贊成嘅，但係唐司長咁樣爆料，又真係令梁愛詩、黃仁龍以至特區政府好尷尬。
第二，唐司長引用黃仁龍呢個「香港故事」講扶貧，遣詞用語亦引起好大反應。
噚日喺尊貴嘅高爾夫球場，有班富貴球友就破口大罵，佢哋承認以前窮，但唔覺自己「出身寒微」，咁講法，係咪一定要係貴族出身至得？其實寒微兩字，自謙就得，用嚟形容人就好惹火，特別係出自唐英年呢類少爺仔把口，更加火上加油。
傳真︰2623-9278
電郵︰[email protected]