打工仔日做夜做，都係希望搵多兩個錢，咁，畀真金白銀做獎勵，肯定最能激勵士氣。中原一姐劉瑛琳就用「現金啟動大獎」，鼓勵前線，做大角嘴一號銀海。
一姐話，過去三日，頭十個開單嘅前線，都可以有六千蚊現金獎，佢嘅主管與區域經理各得兩千。
獎賞一公布，第一日即刻有好消息，九龍豪宅高級分區經理Victor楊思煒，馬上促成一宗相連戶，攞到萬六蚊，佢上司林美娟就有四千。
一姐話，Victor因為係自己帶客做成交易，所以可以收埋前線份錢。其實，之前Victor已經做過五六單一號銀海。一姐透露，到噚日，公司已經送出八萬蚊。
由於前線底薪唔多，得幾千蚊，做成一手最快都要幾個月後至有佣落袋，𠵱家即時送出獎金，前線跟手就有得使，梗係搏命啲啦！睇嚟呢招幾時都有用。