浸會大學今年十一月八日，舉行第四十六屆畢業禮，今年有四位傑出人士獲得榮譽博士銜頭，其中得到榮譽文學博士嘅，係大家好熟識嘅粵劇名伶紅線女。
唔講唔知，原來女姐嘅真名叫鄺健廉。早喺十四歲時，已開始學習粵劇，短短一年就成為花旦，其後更獨創「女腔」，代表作有《昭君出塞》。佢喺四七至九○年間，主演咗九十八齣電影，成為當代中國最具影響力嘅女演員。
女姐五五年移居內地後，致力推動粵劇發展，例如創辦紅豆粵劇團，至今桃李滿門。過往唔少組織都頒過獎畀女姐，表揚佢嘅貢獻，好似聯合國表演藝術協會嘅「傑出藝人獎」同紐約市文化局嘅「亞洲最傑出藝術家獎」等；呢個博士銜頭，可以算係錦上添花。
另外，著名低溫物理學家陳鴻渭教授，獲頒榮譽理學博士；專注研究貧窮問題嘅唐信教授，獲頒社會科學博士銜頭；香港內衣業聯會創辦人謝安如先生，就會攞榮譽工商管理博士。
傳真︰2623-9278
電郵︰[email protected]