市面都好耐冇見呢類大吋數嘅流動式DVD機喇！BBK最近新推了一部10.2”特大芒的DL3103N，全金屬機面加纖薄機身，驟眼睇真係好易誤認為Notebook呢！
BBK係乜嘢牌子？之唔係大家熟悉嘅國產步步高囉！據知佢哋由於想進軍世界市場，所以將名稱改為更易記嘅英文縮寫！所以DL3103N亦有意味着係打響頭炮之作，因此機身用料絕對落重手！行內人都知，BBK機餡一向都係用開「Pan記」嘢，雖然今次冇標明用正佢啲料，不過畫質都係一貫咁靚仔；至於「乜碟」都照讀嘅國產機傳統，亦一樣予以保留，基本DVD、SVCD、VCD、CD、MP3CD就點都走唔甩，不過最正都係對應MPEG4影像格式，除咗自己燒碟外，機身重配置有MS/SD/MMC三合一插口，近排市面潮玩PSP睇片，咁大家「壓落」嘅正片，亦可以透過記憶卡放落DL3103N度睇！
至於價錢方面，比對現時流動式DVD機行程，一般10”嘅日本機造價約$6,000-$7,000，而國產機就玩緊$3,000-$4,000，至於DL3103N就首度打破心理關口，低水至$2,980，跟機重齊料有電、有CarKit，真係幾抵玩吓！
記者、攝影：朱崇德
中原電器（27707608）
地址：旺角西洋菜南行1A號舖