繼劉德華話要聯合五大影帝合作拍一部戲嚟救影市後，由香港十間主流電影公司組成嘅香港電影商會上個禮拜開例會時，有代表又提出另一個救市方法，就係十間公司聯合拍部賀歲片出嚟，顯示影圈嘅團結。
寰亞人強馬壯
佢哋初步傾呢部賀歲片製作費約二、三千萬，演員同製作費都係由呢十間公司夾份提供，將來部戲賺錢就平均分。統籌就偏向由寰亞拉頭纜，佢公司有劉德華、鄭秀文同黎明等紅演員，又有杜琪峰同劉偉強呢啲導演嘅片約喺手，搞乜都容易成事啲。
之不過中國星今年拍緊賀歲片《招財進寶購物狂》，唔想自己打自己，所以呢次就唔想參與啦！而邵氏同東方電影一樣唔想玩，所以𠵱家只有七間公司去馬，開始傾已經唔係間間公司都參與，點團結呀！
講真，馮仁昭就唔多睇好呢個計劃，因為涉及太多問題，好似版權誰屬、每間公司點樣出演員已經有排煩，到時寰亞出個劉德華，英皇出個Twins，片酬差咁遠，條數點計先？而且明年一月二十九日就過年，得幾個月時間籌備又真係幾倉卒，如果要急就章，不如算罷啦！