趙飛雲噚日同成班股友入馬場搏殺，苦戰至第7場才靠大摩隻「步步勇」翻身，大摩第8場有隻實力馬「真好嘢」，係趙飛雲心水，加上見到馬主之一嘅思捷（330）老闆邢李㷧拖埋靚老婆林青霞親臨捧場，信心更加大而落重注，結果真失望。尾場再捧信置（083）主席黃志祥隻「喜利多」，因為上次WQ齊中贏過錢，估唔到又大熱死火，好似港股大跌市，連上市公司主席的愛駒都表現失色。
跑完馬之後雖然大家都要輸錢，但仍然齊齊拉隊去食大閘蟹，希望食過蟹後大家在股市啲蟹貨可以鬆縛。
上周六提過外圍形勢頗不利，美日股市估計未跌完。上周五杜指先升後回，最後收10292，升5點，始終未能重返短中期升軌之上收市。今日日股假期休市，應該對港股有利，但明日又輪到港股重陽假期，相信一般散戶都係睇多過做，放完假之後再重新入市。
信置9元現支持
地產股受息魔困擾，上周紛紛由高位回落，賣地後走勢一直偏強的信置，曾傳出抽穿10元之後進行配股，可惜上周一升至9.95高位就見有回吐，其後跟隨大市調整，上周四曾跌至9元才喘定，上周五反彈回9.15元收市，假如信置仍有動作跟尾，相信股價再跌幅度有限，短期若見在8.80-9元水平再獲支持，可小注博反彈。
藍籌博反彈，首選當然是中移動（941），上周跌近50日線34.50元見支持，上周五反彈1.1%，收35.35元，日線圖出現陀螺。首個反彈阻力在20日線36.20元，若確認升破，波動區將上移回38.50元至36元區域。在50日線附近買入較具值博率，短炒以34.50元止蝕。
趙飛雲