雖然拍DV對一眾大小DC嚟講，都係一個附加功能，但對用家嚟講，影相之餘重可以拍埋片又的確增加唔少樂趣，好似Canon新推出嘅S80，能夠拍出XGA高解像影片，比DV機更高，加上本身已備有810萬像素影相級數，無論影相定拍片都有高水準，正係動靜皆宜！
記者：許福合 攝影：陳盛臣
Profile
感光元件：810萬像素CCD
變焦：3.6倍光學、4倍數碼
記憶卡：SD/MMC
LCD：2.5吋
ISO：50/100/200/400
電源：專用鋰電池
體積：104×57×38.8mm
重量：225g
查詢：CanonHK（21702888）
S80論體形，都可符合輕巧DC之列，機身大小同一般掌上型相機差唔多，重225g，以咁多功能與同級機比較，絕對唔算大份，雖然功能多多，不過外形就同近排Canon幾部新機相似，只係機面換上全黑設計，感覺比較Pro！
1,024×768拍片
雖然作為一部數碼相機，主要設計都係為咗影相，不過S80最突破之處，反而係喺拍攝DV上，擁有全球首創XGA級影片拍攝功能，格式為AVI連聲，XGA即係1,024×768（一般DC只有640×480），以一般15吋LCD芒為例，都會設定成以XGA顯示，即係話當播放由S80所拍出影片時，影片就已經足夠塞滿整個畫面，而一般DV機反而達唔到同樣效果，事關DV機都會跟番DVD影片規格，而DVD解像度為800×600，雖然唔可以單以解像度比較兩者質素，但以畫面大小來講，S80肯定勝出！而拍片流暢度就只能算一般，以XGA拍DV，只能以每秒15格進行，加上S80並無硬碟或大容量裝置，拍攝時間亦有所限制，即使插入1GBSD卡，亦只能拍大約10分鐘XGA影片，所以想又影相又拍XGA片，就要預備多張大GB數SD卡。
810萬像素CCD
除非要印相片印到A3咁大，一般來講500萬像素對好多用家都好夠用，不過相機解像度始終係級數嘅指標，S80除咗達到810萬像素級數，連帶配合番同級功能，所以睇CCD來買機都係無錯，好似S80功能就相當唔錯，使用Canon相當出名嘅DIGICII處理器，對焦到儲相速度都令人滿意，背面2.5吋LCD質素唔錯，有需要時重可以隨時校光啲，室外拍攝就相當有用。S80有齊手動同自動拍攝功能，另外本身亦預備咗多達21個預設拍攝場景，唔使動腦筋就可以用到最適合拍攝設定。S80外加配件都好齊全，由遠攝鏡、廣角鏡、外置閃燈到防水殼都有齊，正係上山下海都啱用。
鏡頭轉住出 酷！
S80使用推蓋式開關，只要推開機蓋，就會見到鏡頭伸出，鏡頭分成三段，留意鏡頭伸出時，會旋轉打圈走出來，除咗特別外，相信對縮短鏡頭同提高光學變焦都有所幫助，S80就提供比一般高嘅3.6倍光學變焦，加上4倍數碼，總變焦數可達14倍。而鏡頭重係一支廣角鏡頭，相當於28-100mm，加上屬於高折射UA鏡，以廣角拍攝時，畫面邊緣都唔覺變形，要影全體大合照或氣勢山河景色都最拿手！除咗鏡頭識得轉，機背亦都有個非常好用多功能旋掣，適用於設定拍攝模式、調校ISO、快門、光圈等功能，用落非常方便，尤其適合單手操作，只要手指公一撥，就可以更改好多功能。
動靜測試
相片
用色板測試S80，發現大多數顏色都好準確，只係紅同黃略為鮮色。
XGA影片
呢張相片係筆者從拍得DV擷取下來的相片，可見到畫面質素相當不俗，除咗15fps略為低外，整體令人滿意。
試玩意見
浩然用家
S80以功能而論實在無得彈，只係略嫌機身厚咗啲，不過可以拍得XGA影片，都可以補番數，好玩好多，加埋有防水殼，可以潛水拍片。
