近排金價又好以發咗癲咁升，相信好多人都好開心，但最開心嗰個，就一定要數以金廁所聞名嘅恒豐金業主席林世榮。林世榮同蘭西講，當年佢整個金廁所出嚟，除咗想做一個獨一無二嘅景點外，重因為當年小布殊上台做美國總統，估佢一定會打仗，結果中晒。
佢話，當年老布殊打咗場波斯灣戰爭，全球金價勁升，搞到佢都輸鑊金嘅，所以當老布殊個仔上場，佢即刻整個金廁所，一於寓儲蓄於展覽。結果係點？林老闆話，當年佢用咗三千八百萬，𠵱家連同其他展品，已經升值倍幾，去到成四億銀。
雖則升值咗成倍有多，但林老闆話，因為金廁所始終都係一個出名嘅景點，佢暫時都冇計劃「溶廁」套現。
佢重話，𠵱家每日都有一個習慣，就係返工前一定要去金廁所朝拜一下。