張栢芝前經理人朱永龍大前日凌晨在深圳遇襲，被三名兇徒洗劫，朱永龍反抗被斬，頸部大動脈傷痕長達七公分，背部中刀傷及胸腔，傷勢嚴重，現在深圳留醫。昨日朱永龍談及事發經過時說：「差啲死、執番條命！」
張栢芝前經理人朱永龍大前日凌晨時分到深圳，以活動總監身份與贊助商洽談下月八日在北京人民大會堂舉行的「大地之愛．母親水窖巨星慈善大匯演」事宜，其後朱永龍返回下榻的深圳新都酒店時，在酒店附近被三名冷血兇徒打劫，他奮力反抗，被斬傷頸及背部，大量出血，事後他負傷乘的士到醫院。
「啲血好似水喉咁噴」
現時朱永龍仍在深圳留醫，經輸血及急救後已度過危險期，昨日本報透過長途電話聯絡朱永龍時，他氣若游絲說：「差啲死呀，我上去傾籌款贊助，傾完走嗰陣俾人搶手機，佢哋喺後面扯我條金鏈，又用刀插我，割我條頸，啲血好似水喉咁噴。」
昨午記者到深圳探訪朱永龍，他在胸外科病房留醫，其鼻、手背及身體均有插喉，床邊置膠袋放體內瘀血，傷勢相當嚴重，因頸、胸重創，故說話十分困難，但精神不錯。
朱永龍說：「我條頸大動脈俾人割咗一刀，另一刀插穿肺，以為自己會死呀，搶救咗五個鐘，執番條命，今日情況好好多，冇感染就可以掹喉，都想快啲返香港，𠵱家唔可以郁，起碼郁得番至可以返香港。」
朱永龍談到事發經過時說：「啲人好狼死，通常捅一刀就死，今次執番身彩。」問他有否想過與尋仇有關？他說：「我真係冇得罪人，我上嚟係做善事。」
醫生：兩日可出院
遇襲後，朱永龍表示人生觀大變，他說：「人臨死嘅時候，瞇埋對眼就乜嘢都冇晒，好多嘢都唔重要，有乜嘢拗撬，原來瞇埋眼都係冇。」他希望盡快痊癒，趕及下月出席北京的慈善活動。
朱永龍的主診醫生張衛星昨日表示朱永龍傷勢嚴重，但沒性命危險，他中了兩刀，一刀在頸部大動脈，傷痕長達七公分，背部一刀傷及胸腔，幸無刺穿肺部，今早照X光片後，無大礙可拔去喉管，再觀察兩日應可出院。而至昨日為止，朱永龍的醫療費要四千多元。
栢芝小春致電問候
而張栢芝與陳小春昨在灣仔拍戲，二人表示已致電慰問朱永龍，小春說：「佢有聽電話，講到嘢，情況OK嘅。」在旁的栢芝則說：「我同小春都知道呢件事。」
對於有傳朱永龍遇襲另有內情，小春搶着說：「唔係，真係打劫！」但栢芝未作回應便上車離開，不過栢芝經理人李小姐昨稱栢芝已託人送花給朱永龍。
採訪、攝影：曾小嘉
