麥導演唔寫專欄，話要放多點心機去拍戲，蘋果編輯又想繼續有人講吓電影，但港產片近來都係鬧吓交，又話要救市，又話要五大影帝開戲，講到七國咁亂，都唔知講去邊。我波波唯有臨危受命，不過都是做個旁觀者，講少少自己意見。
其實港產片講救市都講了好幾年，到底方向應該怎樣？最初確實見到各方面都出力，政府搞咗個「香港國際影視展」，搞得有聲有色。不過聽到有人話下一年就唔知點搞，因為港產片數量持續下降，今年開拍的電影只有四十多部，到「國際影視展」嘅時候，都唔知攞甚麼出來展？但係我就唔認同，我覺得全世界嘅影展、電影節或各類型頒獎禮都只會集中目光在數部重點電影身上，數量多少根本不是一個問題，但如果一年得一部戲，咁當然就唔好搞啦。
雖然電影開拍數量少，但質量上是提升了。相比以往幾年，其實是多了大製作同認真的電影。不過市場仍在轉變中，部份習慣豐收嘅人可能接受不了。重點係大家一定要察覺電影作為一個娛樂節目已經不是太吸引，你問問年青人，唔可以飲酒，唔可以食煙，唔可以講粗口！咁重有甚麼娛樂呢？但並不代表不用再拍電影，每年大檔期總會有三至四部電影好成功，大家畀心機做好佢，電影唔會再變回一個大行業，希望大家接受。
如果次次有乜頭暈身熱都要叫齊五個影帝出來拍戲救市，咁就真是益咗影迷，不過就只會變成一年睇一部戲。