周潤發昨日在巴黎接受訪問，暢談亞洲電影現況。他表示中國電影之父黎民偉是他心目中的亞洲英雄，他對韓流襲亞大表支持，更坦言想與李英愛合作拍片。 記者梁錦貞、林德雄巴黎直擊
周潤發應名牌LouisVuitton之邀，出席今日在巴黎舉行的LV時裝騷及開幕酒會。周潤發昨日先以一身最愛的九龍城街坊裝，在四季酒店接受亞洲傳媒訪問，暢談巴黎、影相與名牌經。
支持韓國電影
發哥甫見記者即開懷笑說：「我都係受人二分四做擦鞋仔咋！」早前劉德華提議五大影帝聯手救巿，周潤發表示不介意參演，他說：「《無間道》都四大星啦，多個有幾難啫？大前提係，係咪一部戲就救到巿先？我係做演員，只係燈光下嘅一個工人，我係追求好角色、好劇本，時間就到，一定OK。不過香港電影budget（成本）太細，咁嘅制度下，個個人都咁慘！香港啲導演係超人嚟，香港電影喺無乜支持下，靠自己揼吓、揼吓咁揼出嚟！」
成龍早前指韓國演藝界搶攻外地巿場，迴響甚大，發哥則大唱反調，支持韓流，他說：「呢件係非常好嘅事！好嘢應該支持，亦帶畀人唔同嘅訊息同選擇，我都想同李英愛合作拍片，咁難得有個女仔讀完大學先拍戲，又拍得咁好，政府又咁支持。TonyJaa套片都好睇、印度片收得我都好開心，證明香港好似中央車站咁，乜都有，乜都好！」
自選亞洲英雄
提到美國《時代》周刊選亞洲英雄，《臥虎藏龍》監製江志強亦入選，周潤發心目中的亞洲英雄則首選「中國電影之父」黎民偉，他說：「無咗黎生，中國電影無咁光輝！江志強daddy（安樂影片創辦人江祖貽）亦帶咗好多西方電影入巿場，功不可沒。」不過發哥又不忙大晒幸福，他更稱自己最大的名牌就是太太陳薈蓮。
