入行二十五載的黃日華拍劇無數，近期他再戰影圈，夥老友劉德華合演電影《童夢奇緣》，但資深的黃日華面對影帝老友竟變回初哥，要對方教路提點。但他談到無綫（TVB）娘家則暢所欲言，有如阿媽教仔般一語揭盡無綫各自為政、製作縮皮、劇集橋段乏善可陳及質素下降的瘡疤，他笑言：「我話TVB都係想佢好！」
削資 質素下降
對於無綫，黃日華實有說不盡的話題，活像一本TVB百科全書，任何問題都能解答。雖然華仔曾屢次批評無綫，但他說那種感受等同阿媽教仔，打者愛也，愛你才罵你，明未？
裁員打擊士氣
日前華仔在灣仔接受訪問時說：「我哋嗰個年代好好彩，電視台出身最啱timing（時機），八十年代電視圈係最蓬勃、最高峯嘅時代，所有小生話要跳槽，TVB冇人用咪用新人，我哋啱啱讀完訓練班，第一步就比人行快好多。嗰時好多前輩喺電視台，個個教啲，我哋又個個學啲，基礎打得好啲，累積經驗，大家一條心做一件事。𠵱家時代轉咗，公司上市要循規蹈矩，揸正嚟做，大家嘅作戰情緒、工作熱誠摧毀咗。
「九十年代尾經濟唔好，又裁員，日日誠惶誠恐，唔知驚幾耐，製作又縮皮，用最少錢拍晒佢，質素下降，炒得嘅炒，走得嘅走，留唔住人，好嘅支柱冇晒，咪冧晒囉！」
華仔續說：「𠵱家呢批新人，冇乜前輩教佢哋，電視台各自為政，做完自己嘢就算，唔好咁多聲氣，收工就走，好唔好唔關我事。以前大家係做多啲唔緊要，做到好為止，𠵱家少做少錯，唔講唔錯，咁多因素影響又點會好？但TVB立場啱，上市公司做生意，要畀股民睇，要利用資源賺錢為先，用最少人力物力拍電視劇，係唔同咗，都唔可以完全怪TVB。」
「套套差唔多」
問華仔近年曾否追看TVB的劇集？他想一想便說：「有，《婚前昏後》，阿姐（汪明荃）做嘅。」問他是否不想看電視劇？他坦白說：「其他唔想睇，套套劇情差唔多，睇邊個做啫，自己都唔做電視劇，梗係唔想睇啦。拍嘅古裝太簡單，個個街景都一樣，清朝又係呢條街，明朝又係呢條街，一定要返內地拍㗎，人哋啲景，梳頭、化妝、服裝幾靚，認真好多。無綫嘅古裝同時裝又差唔多，幾角戀跟住尋仇，古仔冇乜新鮮感。」
今年華仔看得最多集數的無綫劇是《學警雄心》，只因捧老友苗僑偉場，更因而看到被喻為無綫新人王的吳卓羲在該劇中的演出。華仔說：「睇到吳卓羲演出幾勤力，都畀心機，重係起步階段，再浸一、兩年應該有大啲進步。」
謹記刻苦耐勞
不過，現今小生的是非沒完沒了，與華仔當年小生間的和平共處確有天壤之別，華仔寄語一批後輩說：「首先唔好怕辛苦，唔好介意拍古裝定時裝，古裝嘅海外市場大過香港好多。」
問華仔有否擔心自己的敢言會被TVB列入黑名單？他說：「TVB了解我係咁直、係咁戇居，我係TVB出身，冇TVB冇我，我都係想佢好，冇劇本、飛紙仔，邊得㗎？TVB咁大機構又賺錢，點解唔搞啲好劇本出嚟呢？如果有好劇本，我都會返去拍。」