盈大地產（432）經過呢一年輾轉反側，又再回落到第一批可換股票據成本價水位，又有得諗。盈大變身小小超地產旗艦時，向阿媽電盈（008）發咗兩批可換股票據，第一批11.7億銀，每股兌換價2.25元，今年2月，電盈已經行使權利，將第一批票據全數兌換盈大正股，盈大現價（2.3元），同呢批票據兌換成本價差無幾。
再講，除咗已兌換首批票據，電盈家陣重揸住盈大第二批24.2億銀嘅可換股票據，每股兌換價3.6元，亦代表現價要翻半番先到價。要咁睇，盈大變身小小超地產旗艦，兩年都未夠，盈大獲注入貝沙灣，嚟緊日子業績唔成問題，中線睇，盈大重有本土重建機樓及與網通（906）阿媽網通集團（網通集團喺祖國土儲1.7億平方呎），喺祖國物業發展大計等開鑼，做大事，有時候係要煲。呢隻股要長短打，揸一手長線，一手2.25元至2.9元做RangeTrading。
一拖博技術反彈
一拖（038）8月底公布見紅業績後，整個下跌裂口你歎，再跌近1蚊一年支持位，可以博反彈，又講兩點：睇往績，一拖過去5個財政年度，00年至02年連續3年見紅，03年恢復盈利之後，04年跟住又倒退，最新05年度中期重虧轉蝕2535萬銀人仔，但有危自有機，要諗吓，業務係咪有整合嘅需要同可能？第二，一拖最新每股NAV2.5元，現價（1.19元）折讓逾5成，而且重係維持淨現金狀2.72億銀，財政冇問題，重有資產同現金墊底。老老實實，呢劑純博技術反彈，短炒咪變長揸。
錢雋