肥龍許仕仁日前公布西九新方案，雖然放棄咗單一招標，項目裏面一半商住用地要拎返出嚟畀其他地產商競投，但入圍財團仍然係西九一哥。
皆因佢負責統籌，佢大可以留返起啲靚地自己起，剩返啲街頭巷尾畀其他地產商爭；重有，就算其他地產商喺佢手指罅爭到塊地，佢一句話設計唔配合整體環境，你就要返去再規劃過，難怪所謂放棄單一招標，爭議重係咁大啦。
建侏羅紀公園
噚日八方去灣仔會展嘅世界地產博覽展行咗一轉，發現肥龍呢個西九新方案，原來喺杜拜都有一模一樣嘅版本，就係杜拜嘅主題公園發展項目「CityofArabia」（阿拉伯之城）。
呢個建築面積二千萬平方呎嘅項目，有個侏羅紀做主題嘅公園，重有全球最大嘅購物城、酒店、住宅同商業樓宇，由阿拉伯發展商I&M攞到發展權。
呢個項目嘅建築師講，I&M負責興建同營運主題公園，電影《侏羅紀公園》嘅古生物顧問會畀意見，又請咗日本Kororor公園製作百幾條機械恐龍，放喺公園四圍走，單係興建費都十四億元。
I&M攞到嘅包括購物城、獨立別墅，同埋部份高層大廈。由於項目太大，所以其餘嘅高層大廈發展權，會透過賣地引入其他投資者，但I&M保留規模權，即係買地嘅發展商起幾大面積、起幾高，都由I&M話事。
聽落係咪好似西九嘅新方案呢？唔通班立法會議員去西班牙畢爾包取經，肥龍就偷偷去咗杜拜取經？
爆料熱線：29290000、27860099
報料傳真：26239278
報料電郵：[email protected]