煲碟王：啤妹法廚酒醉結緣

楊千嬅同吳彥祖呢對銀幕組合，相信大家都唔係第一次睇，今年二人又再次合作，主演由爾冬陞執導嘅《千杯不醉》，千嬅更破天荒咁飾演啤酒女郎，新鮮感十足，加上有萬人迷吳彥祖飾演嘅靚仔廚師，難怪累積票房可以過千萬！

記者：梁瑋瑜

其實打從楊千嬅同吳彥祖喺《新紮師妹》首度合作之後，佢哋兩個主演嘅電影就被喻為票房靈藥，喺今時今日下載風氣強盛嘅時候，仍然吸引到好多人畀錢入戲院睇，唔知呢個係咪一向拍開文藝片嘅爾冬陞，都轉型拍愛情喜劇嘅原因呢？

■話明叫「千杯不醉」，梗係飲幾多都唔醉。

■呢對票房靈藥再次合作。

■Michael暫住小敏家，不過講明唔准喺屋企着住底褲周圍走！

配角方中信勁爆笑

片名叫做《千杯不醉》，當然有好多關於酒嘅劇情，身為啤酒女郎嘅小敏，見慣好多男人只會喺酒後，向女朋友講「我愛你」甚至求婚，所以對於男人酒後嘅甜言蜜語冇晒信心，只希望自己愛嘅人可以喺清醒嘅時候向佢表白，而Michael當然都好識做，最終大團圓收場。
《千杯不醉》係一套十分熱鬧嘅電影，兩位主角表現算唔錯，記者較為欣賞嘅係方中信飾演嘅黑社會大佬九哥，同埋同性戀者火鍋店老闆谷德昭，估唔到方中信嘅喜劇感都十分高，令人留下深刻嘅印象，大家記住多多留意。

■方中信搞笑形象令人難忘。

■兩隊啤酒妹對決，其中官恩娜表現都十分出色。

■做乜喊得咁慘，要睇過先知喇。

千嬅Daniel玩同居

戲裏面楊千嬅飾演一個啤酒女郎小敏，雖然外貌同身材都唔算突出，但憑住其「千杯不醉」嘅好酒量，深受客人歡迎；小敏嘅夢想係開一間有情調嘅咖啡店；而由吳彥祖飾演、法國長大嘅浪子廚師Michael，因為其法國餐廳生意慘淡，去到小敏嘅賣酒嘅火鍋店飲酒，咁就認識咗小敏。
小敏決定與Michael共同打理呢間餐廳，更讓Michael暫住佢屋企，二人日久生情發展成情侶，但係對於慣於浪迹天涯嘅Michael，會唔會為咗小敏而留喺香港、過安定嘅生活呢？

收錄未出街激吻片段

《千杯不醉》嘅DVD收錄咗NG片段、從未曝光片段同埋製作特輯等，大部份都係收錄咗千嬅爆笑及Daniel口窒窒背廣東話對白等片段，不過記者就略嫌過長同埋唔夠多元化；喺從未曝光片段裏面，最有睇頭嘅當然係吳彥祖同楊千嬅激吻嘅片段，二人喺拍呢齣戲嘅時候傳過不少緋聞，唔知係咪因為想淡化緋聞，所以呢段戲冇喺銀幕上出現呢？唔睇製作特輯都唔知，原來千嬅同Daniel為咗更入戲，好幾場戲都真係飲到醉醉哋先去拍，非常之認真㗎，大家千祈唔好錯過！

■靚仔廚師教整嘢食，小敏梗係落足心機學。

■Michael得到高薪厚職，但係咪佢想像中咁理想？

DVDPro(23326326)　
旺角奶路臣街6E德發商場地庫B4舖

■想睇爆笑位，要留意Bonus嘅NG片段。

■激吻片段只限DVD有得睇。