被稱為港島解放區嘅北角，向來係土共根據地，民主黨兩個前主席馬丁同楊森，身先士卒深入敵陣，喺北角開新議員辦事處，噚日開幕禮請到多名高官到賀，包括近日頻頻為西九解畫嘅孫公同即將無官一身輕嘅媽打李麗娟。由煲呔曾帶起嘅錫錫面珠熱潮吹得咁行，馬丁識咗媽打幾十年，噚日就喺徇眾要求下好肉緊咁錫咗媽打一啖，賀佢榮休，睇到個個都拍晒手掌。
其實馬丁同楊森喺北角邨未清拆時，喺邨內有個辦事處，所以今次只係「收復失地」。范國威就話，好多人以為北角係紅區不利民主黨，其實大錯特錯，以佢近日喺北角擺檔籌款經驗，市民對民主黨反應唔錯，企街八粒鐘籌到超過五千蚊，佢估計同北角半山有大量中產有關。
鄭家富則話，因為近排喉痛失聲，所以籌款時剩係可以舉高紙牌呼籲市民科水，佢話今年籌款成績遠遜去年，少過舊年三分一。黨內有人估計，市民對匯標事件印象仍然好深，難免打擊籌款成績，但近日民主黨聲望回升，相信對籌款數字會有幫助。
爆料熱線：29290000、27860099
報料傳真：26239278
報料電郵：[email protected]