由黃日華、劉德華、梁朝偉、苗僑偉和湯鎮業組成的「無綫五虎」當年叱咤一時，堪稱無綫開台三十八年來捧人最成功的一次。五虎早年離巢後各有發展，黃日華表示五虎私底下聯絡不多，離巢至今齊人出席的活動僅得三次而已。
華仔說：「私底下都唔會五個一齊食飯，最多四個，爭個梁朝偉，佢好有自己嘅生活空間，好似消失咗咁，啲人成日希望五虎可以做埋同一套戲，幾難，有好多客觀因素影響。」
戥苗僑偉開心
談到湯鎮業，華仔笑瞇瞇說：「佢喺內地搞訓練班、搞製作，揀啱自己條路，佢做幕後出色好多；阿苗呢，初時我都唔接受佢拍番電視劇，佢解釋話生意又賣盤畀人，又得閒咗，唔可以日日都打golf㗎，咁啱有監製搵咪拍吓，成功咗又幾好喎，搵番以前受歡迎嘅心態，感受到又一次威過，身為朋友都戥佢開心啦。」
華仔續說：「劉華就愈嚟愈認真、愈嚟愈勤力，我成日都叫佢唞吓，但佢鍾意呢啲生活，佢嘅眼光開放咗，肯接受人哋意見，會關心身邊人，有進步，唔同以前只係關心自己，唔理其他人。」
採訪：朱倬誼 攝影：陳偉權 場地：Gossip51